JMK PARK ACADEMY Bingwa ligi ya Wanawake Mkoa wa Dar es Salaam
Mchezo wa fainali Mashindano ya ligi ya Wanawake mkoa wa Dar es Salaam umemalizika kwa timu ya JMK Park Academy kuchukua ubingwa huo baada ya kuifunga timu ya Kinondoni Queens magoli 4-1 kwenye uwanja wa Karume uliopo makao makuu ya Shirikisho la Mpira wa Miguu Tanzania.
Mchezo huo uliopigwa majira ya saa 10:00 jioni haukuwa rahisi kwa timu zote mbili, licha ya JMK kutangulia kupata matokeo kabla ya mapumziko, matokeo ambayo yalionekana kuwatia nguvu zaidi kikosi hiko kwenye kipindi cha pili na kufunga magoli mengi zaidi kwenye kipindi cha pili huku waki ruhusu bao 1 pekee kwa wapinzani wao.
Kwa matokeo hayo JMK Park Academy ndio timu pekee itayokwenda kuziwakilisha timu za Dar es Salaam kwenye hatua inayofuata, ambapo timu hiyo itaungana na timu kutoka mikoa mingine mashindano ya ligi ya Mabingwa wa mikoa.
Mgeni rasmi kwenye mchezo huo wa fainali ambaye ni Makamu Mwenyekiti wa DRFA Benny Kisaka aliwakabidhi kombe pamoja na medali mabingwa hao sambamba na kupongeza juhudi za Shirikisho la Mpira wa Miguu Tanzania TFF kwa kuendesha na kusimamia mashindano hayo huku akisema sio jambo rahisi bali lenye kuhitaji kujitoa zaidi kwa watendaji.
Ligi ya wanawake mkoa wa Dar es Salaam ilijumuisha timu 10 ambapo mshindi wa 3 ni timu ya Masala Princess, timu nyingine; Evergreen Queens , Mabibo Queens, Sayari Women, Ukonga, Young Star, Temeke Sisters na The Eleven Star.
