Twiga Stars yaanza vyema Cosafa
Timu ya Taifa ya wanawake ‘Twiga Stars’ imeanza vyema michuano ya HOLLYWOODBETS COSAFA baada ya kuichakaza Comoro mabao 3-0 katika mchezo wa kundi C uliopigwa katika dimba la Madibaz Port Elizabeth, Afrika Kusini.Bao la kwanza Kwa Twiga Stars’ lilipachikwa dakika ya 13 na Donisia Minja na dakika ya 41 Enekia Lunyamila akaongeza bao la pili na kuwafanya kwenda mapumziko wakiwa mbele Kwa magoli 2-0.Kipindi cha pili kilianza kwa timu zote kufanya mabadiliko ambayo yaliwapa faida zaidi Twiga Stars na kufanikiwa kuongeza bao la taru lililofungwa na Enekia dakika ya 72 huku akiibuka kuwa mchezaji bora wa mchezo huo.Kocha wa Twiga Stars Bakari Shime alisema mchezo ulikuwa mgumu, wachezaji wamecheza vizuri na ana imani kikosi kitaendelea kufanya vizuri huku akiwa amechanganya wachezaji wengi chipukizi ili kuwapa uzoefu huku wakitafuta alama zitakazowapeleka nusu fainali.Twiga Stars itacheza mchezo wake wa pili na Botswana Septemba 5 na watamaliza hatua ya makundi Septemba 7 kwa kucheza na Malawi.
