Kikosi cha Serengeti Girls Kurejea Tanzania Leo
Wachezaji wa timu ya Serengeti Girls wameianza safari ya kwenda Mjini Bukoba hii leo April 17, 2022 wakitokea Mjini Ngozi Burundi, walikokwenda kucheza mchezo wao dhidi ya timu ya wasichana ya U17 ya Burundi, mchezo uliomalizika kwa Tanzania kupata ushindi wa bao 4-0.
Kikosi hicho kilichokuwa na jumla ya wachezaji 26 na benchi la ufundi linaloongozwa na Kocha Mkuu Bakari Shime, kimeondoka Burundi mnamo majira ya saa 12: 00 asubuhi kwa saa za Burundi, sawa na saa 1:00 asubuhi nchini Tanzania ambapo kitapitia Bukoba kwa ajili ya kupanda ndege kesho Aprili 18, kuelekea Jijini Dar es Salaam kujiandaa na safari ya Zanzibar ambako kitakwenda kupiga kambi kikiwasubiri Burundi kwa ajili ya mchezo wa marudiano mwezi Mei Mosi.
Kwa mujibu wa kocha Mkuu Bakari Shime kikosi hicho kwenda kujipanga kwa ajili ya mchezo huo wa marudiano dhidi ya Burundi huku kikiutazama zaidi mchezo wake dhidi ya Cameroon ama timu itakayofuzu hatua hiyo.
Serengeti Girls imebakiza michezo mitatu pekee ili kutinga kwenye michuano ya Kombe la Dunia kwa wachezaji wasichana wenye umri chini ya miaka 17 huko nchini India ikiwa na pamoja na mchezo huo mmoja utakaochezwa Visiwani Zanzibar siku ya Mei Mosi. Ili kufuzu kucheza Kombe hilo la Dunia, Tanzania italazimika kushinda michezo yake yote kwa namna yeyote.
