SERENGETI GIRLS YATINGA ROBO FAINALI KOMBE LA DUNIA
Timu ya Taifa ya wanawake U17 Serengeti Girls imefuzu hatua ya robo fainali ya Kombe la Dunia 2022, India baada ya kutoka sare ya kufungana bao 1-1 na Canada kwenye mchezo wa mwisho wa Kundi D.
Canada walianza kufunga kwa mkwaju wa penati kupitia kwa Amanda Allen kabla ya Veronica Mapunda kuifungia Serengeti Girls bao la kusawazisha katika dakika ya 35 kipindi cha kwanza ambalo limetosha kuipa alama moja muhimu na kuwafanya wafikishe alama 4 zilizowapa nafasi ya kufuzu robo fainali.
Kufika hatua hiyo, Serengeti Girls imefungwa mchezo mmoja dhidi ya Japan ikapata ushindi dhidi ya Ufaransa kabla ya kutoka sare na Canada katika mchezo wa mwisho wa makundi.
Serengeti Girls inaungana na Japan kucheza robo fainali kutoka katika kundi D huku Ufaransa na Canada zikisukumwa nje ya michuano hiyo.
Timu nyingine zilizofuzu kutoka makundi mengine ni Marekani, Brazil, Ujerumani, Nigeria, Colombia na Hispania.
