Simba Mambo Safi, Yaendeleza Ubabe Kwa Mkapa
Ligi Kuu ya NBC imeendelea kwa mchezo mmoja kupigwa kwenye dimba la Mkapa ambapo timu ya Simba ilikuwa mwenyeji wa Mtibwa Sugar katika mchezo uliopigwa Juni 23, 2022 majira ya saa 1:00 usiku.
Simba ilimaliza mchezo huo mapema tu ndani ya kipindi cha kwanza kwa kuandika mabao mawili yaliyofungwa na nyota wa kigeni Pape Sakho na Peter Banda na kuifanya mechi hiyo kutamatika kwa ushindi huo wa bao 2-0.
Ushindi huo kwa Simba ulikuwa na umuhimu kutokana na kuwa ndiyo mchezo wa mwisho kuchezwa na timu hiyo katika uwanja wa nyumbani kwa michezo ya Ligi Kuu ya NBC kwa msimu huu wa 2021/2022 ambapo michezo miwili iliyobakiza; ule wa Mbeya Kwanza na Tanzania Prisons yote itapigwa ugenini.
Bada ya mchezo huo kaimu kocha Mkuu Selemani Matola alisema kuwa amefurahishwa na kiwango kilichooneshwa na wachezaji wote wa Simba huku akipeleka sifa nyingi zaidi kwa wachezaji Peter Banda na Pape Sakho ambao walionesha viwango bora katika mchezo huo.
Aidha, Matola aliongeza akisema timu ya Mtibwa ni kati ya timu bora kwenye Ligi ya NBC hivyo wanapokutana nayo huwa hawaidharau hata kidogo kwa kuwa wanafahamu uwezo na uimara wa kikosi hicho ambacho kimedumu kwenye ligi kuu Tanzania kwa kipindi kirefu bila kushuka.
Kwa upande wa kocha viungo wa Mtibwa Sugar Awadhi Juma alisema timu yake ilitengeneza nafasi nyingi hasa katika kipindi cha kwanza lakini ilishindwa kuzitumia na kwamba kukosekana kwa uwezo binafsi wa mchezaji mmoja mmoja ndiko kuliko wagharimu na kujikuta wanapoteza mchezo huo muhimu kwao kutokana na nafasi waliopo.
Kwa matokeo hayo Simba inaendelea kusalia katika nafasi ya pili huku ikishikilia rekodi yake ya kutopoteza mchezo wa ligi katika dimba la Mkapa kwa msimu wa 2021/2022 na mashindano ya kimataifa ambapo mara nyingi imekuwa ikishinda na kuzisumbua timu za nje ikitembea na kauli mbiu tofauti tofauti mojawapo ikiwa ni; “Kwa Mkapa Hatoki Mtu”.
Katika michezo miwili ya Simba kwenye Ligi Kuu, timu hiyo imeweza kuwapa heshima ya kuwaaga nyota wake wawili wa kigeni Rally Bwalya alieagwa kwenye mchezo dhidi ya KMC huku Pascal Wawa akipewa heshima hiyo hiyo kwenye mchezo wa Juni 23, 2022 dhidi ya Mtibwa Sugar.
