Twiga Stars yatoshana nguvu na Botswana
Timu ya Taifa ya wanawake ‘Twiga stars’ imetoshana nguvu na timu ya taifa ya Botswana kwa kutoka Sare ya kutokufungana katika michuano ya Hollywoodbets Cosafa women’s championship inayoendelea nchini Afrika Kusini.Mchezo huo wakundi C ulipigwa majira ya saa 9:30 katika Dimba la Madibaz baada ya kumalizika kwa mchezo wa mapema uliowakutanisha timu ya Malawi dhidi ya Comoro na Malawi kuibuka na ushindi mnono wa goli 6-0 na kuifanya Malawi kuwa kinara wa kundi C akiwa na alama 4 .Kipindi cha kwanza kilianza Kwa kasi kwa timu ya Twiga Stars kupeleka mashambulizi katika lango la Botswana na kujaribu kutengeneza nafasi licha ya kwamba mashambulizi hayo hayakuzaa matunda mpaka kipindi cha kwanza kinamalizika. Timu ya Botswana ilifanya mabadiliko kipindi cha pili, mabadiliko ambayo hayakuwa na faida yoyote kwao kwani kikosi cha Twiga Stars kilikuwa imara katika kuzuia na kuwafanya wakose nafasi ya kupata bao lolote.Hii ni mara ya tatu kwa timu hizi mbili kukutana katika michuano ya Cosafa mwaka 2020 Botswana iliifunga Tanzania (1-0), Mwaka 2021 katika mchezo wa pili hatua ya makundi Tanzania ikaifunga Botswana (2-0) magoli yaliyofungwa na Donisia Minja DK 6 na Mwanahamisi Shurua DK 79.Mchezo wa mwisho wa hatua za makundi Twiga Stars’ watakutana na Malawi majira ya sa 9:30 katika uwanja wa Isaac Wolfson. Mara ya mwisho Twiga Stars ilikutana na Malawi katika mchezo wa fainali na kuipiga bao (1-0), bao lililopelekea kutwaa Ubingwa wa Michuano ya Cosafa 2021.
