Yanga Yatwaa Ubingwa Ligi Kuu NBC Bila Kupoteza Mechi
Timu ya soka ya Young Africans imeendelea kutoruhusu kupoteza mchezo wowote hadi imefanikiwa kutwaa ubingwa wa Ligi Kuu ya NBC 2021/2022 baada ya kuukosa kwa msimu minne iliyopita.
Young Africans imeutwaa ubingwa huo unao dhaminiwa na Benki ya NBC baada ya kuidhabu timu ya Coastal Union jumla ya mabao 3-0 katika mchezo uliochezwa kwenye uwanja wa Benjamine Mkapa jijini Dar es Salaam mnamo majira ya saa 2:30 usiku.
Mchezo huo wa Ligi Kuu Bara uliokuwa na umuhimu wa aina yake kwa kila timu, ulionekana kuwa na ushindani mkali ndani ya dakika 30 za awali ambapo timu zote zilipambana kutokuruhusu bao lolote. Coastal Union walionekana kujizatiti zaidi wakiwa na tahadhaili kubwa huku wakicheza mchezo wa wazi uliowafanya Young Africans kushindwa kufunguka zaidi kwa kuhofia kuruhusu goli.
Safu ya ulinzi ya Coastal Union ilionekana kufanya vizuri na kumpa wakati mgumu mshambuliaji nyota wa Young Africans Fiston Mayele ambaye alishindwa kutetema ndani ya dakika 30. Hata hivyo, ubora wa nyota huyo mwenye uraia wa Congo ulimfanya aweze kufunga bao mnamo dakika ya 34 ya mchezo licha ya ugumu aliokabliana nao. Bao hilo la Mayele liliduma hadi timu hizo zinakwenda kwenye mapunziko.
Dakika sita pekee za kipindi cha pili ziliitosha Young Africans kuandika bao la pili likifungwa na Chiko Ushindi Wakubanza (dkk51) kabla ya Mayele kupigilia msumari wa tatu na wa mwisho dakika ya 61. Mabao mawili aliyoyafunga Mayele yanamrejesha kuwa kinara wa mabao tena baada ya kufikisha Magoli 16 akimzidi bao moja na ‘assists’ moja pia George Mpole aliye na mabao 15 na assists tatu (3).
Kocha wa Young Africans Mohammed Nabi alisema kuwa mchezo huo ulikuwa na umuhimu mkubwa kwao, hivyo waliuchukulia kama fainali. Alieleza kuwa kutokana na umuhimu huo ndio maana akakiandaa kikosi chake kwa ajili ya kutwaa ubingwa. Kwani, kabla ya mchezo huo aliongea na kila mchezaji kwenye mazoezi na hata wakati akielekea kwenye mchezo (15 Juni, 2022) kwamba kila mmoja akapambane. Hata hivyo, kocha Nabi alikiri kuwa timu ya Coastal Union ilikuwa bora kwenye dakika 45 za kwanza kwani waliwalazimisha wao kukaa nyuma ya mpira kutokana na presha waliyopelekewa, kitu ambacho kilimfanya kocha huyo kwenda kuongea na wachezaji wake kubadili namna ya kucheza.
Nabi aliwapongeza wachezaji wake kwa kufuata maelekezo yaliyopelekea kupatikana kwa ushindi huo muhimu uliyowafanya wao kutawazwa kuwa mabingwa huku wakiwa wamesaliwa na michezo mitatu.
Kwa upenda wa kocha msaidizi wa Coastal Union Joseph Lazaro, yeye alisema ushindi wa Young Africans katika mchezo huo kulitokana na ubora wa timu na kwamba maamuzi ya ushindi wao yaliamuliwa na kiwango cha mchezaji mmoja mmoja kutokana na ubora wao. Hata hivyo, kocha huyo alisema kupoteza kwa mchezo huo hakuna uhusiano na mchezo wa fainali ya FA; akidai kuwa huo ni mchezo mwingine na watajipanga kivingine kuhakikisha wanaibuka washindi na kutwaa Kombe hilo.
Katika mchezo mwingine uliopigwa kwenye dimba la Azam Complex Chamazi, wenyeji Azam FC waliibamiza Mbeya Kwanza bao 2-0 na kuipotezea matumaini ya kusalia kwenye Ligi ya NBC msimu wa 2022/2023 timu hiyo yeneye makazi yake jijini Mbeya.
